Nu penzeru a Oppitu..

Votandumi  pe rretu  vidu li me radici

Chi sunnu ancora a oppitu terra di me amici

Passandu a cotraranza a ‘mmenzu a ji vineji

Mi rendu ora cuntu ca ji anni furu beji

Bastava nenti i nenti oppure nu morzu i lignu

Facivimu u gattuzzu nta ji sirati i giugnu

Jocavamu spenzerati  a manna o a  mmucciateja

Standu finu a tardu nta’ n’angulu i vinejia

Scurusi eranu i ‘mberni  joculani i primaveri

A cosa chiù ‘mportanti  non c’eranu penzeri

Nci furu puru l’anni di passiati i chiazza

Cercandu u sguardu timitu i ll’occhi i na ragazza

Tu fusti assai  ‘mportanti nda l’anni chi passaru

Ma tandu non capisciva era assai cotraru

Riloggiu e madonnina si guardanu a distanza

Quasi a voleri diri non mancatindi i crianza

Pretura cu spitali e curia vescovili

Di certu signi forti di paisi assai civili

Eri comu na guida e pedi d’asprumunti

U circundariu tuttu cu tia faciva i cunti

Spissu si senti diri u paisi è bbandunatu

Forzi non è veru è u tempu che è mutatu

Mutatu a jiri avanti cu nu pedi modernu

Paragonatu a jieri oji pari ‘mpernu

Sicuru non è cosi o megghjiu non d’accorgimu

Simu condizionati du beni chi ti volimu

Stu beni ndi porta a vidiri trubula l’acqua pura

                                                                                     U paisi è sempre chiju non cangia a so natura                                                           

Oppitu resti tu paisi riccu i caluri

Puru se i mali tempi dezzeru sbenturi.

Nino Greco

a.greco@uniserve.it